كشكولي الخاص ستجد فيه آرائي وكتاباتي و خواطري وربما يومياتي .. أتمني أن تستمع بوقتك هنا ومرحبا بك في أي وقت :)

الجمعة، 23 نوفمبر، 2007

عم محمود وعم محمد


عارفين..في ناس كده دايما كل ما تقابل حد فيهم أو تسلم عليه تلاقيه مبتسم في وجهك هاش باش حتي لو كان عنده حاجه مضايقاه أو مشكلة ما دائما هو راض عن حاله مش يقابلك بتكشيره أو بوش بلاستيك حتي لو كنت متعرفوش. الناس دي لما باتعامل معاهم أو اقابلهم بعدها باحس بامل في الحياه اوعلي الاقل يبسيب فيك نوع من الراحه النفسيه بشكل ما.
وعلي النقيض الاخر في ناس دايمة مكشره دايما في ضيق وزهق ولو مفيش سبب للمضايقه يحاول يوجد الاسباب اللي تضايقه وتعكنن عليه ويا سلام لو حد اتاح له الفرصه وضايقه بكلمه أو بموقف تلاقي ثورة عارمة ولو ربنا مقدر لواحد فيهم ضيق في رزقه شويه تلاقيه ساخط غير راض وناظر الي غيره دائما ودول لما بتقابل واحد فيهم بتبقي نفسك تهرب من امامه ولا يترك فيك الا اثر سلبي بشكل ما.
عم محمود كان سواق الاتوبيس بتاع الشركه وهو من النوعيه الراضيه من البشر كل لما تركب معاه يحييك بابتسامه جميله بعدها كلمه طيبه وانتوا عارفين بأه السواقه ومشاكلها دايما فيها ما يحرق الدم هو كان سبحان الله هادي جدا في المواضيع دي ودايما لاتجد الا راض وقلما رأيته علي غير ذلك حتي لو كانت عنده مشاكل في البيت أو في الشغل, فكنت تركب معاه حتي وان كان كلامك واحتكاكك معاه بسيط إلا انه يترك فيك ذلك الاثر الطيب دائما...
بعد عم محمود جاءنا سائق اخر هو عم محمد وهو من النوعيه الاخري دايما مكشر دايما في حاجه مضايقاه لا تكاد تري اثرابتسامه ربما قد ابتسمها مره في وجهه بل تري اثارا قد تركتهاخطوط التكشيره والكلضمه في وجهه لا اظنها تضيع مع الزمان الا بمعجزة من الرحمن. دايما يثور لاتفه الاسباب لا تجده راض عن عمله ولا عن حاله حتي انه يتكلم مع نفسه متذمرا عن العمل او عن الطريق فتكون النتيجه انك تحاول دائما ان تتحاشي أن تحتك به الا مضطرا.
فلما باسمع حديث رسول الله صلي الله عليه وسلم "تبسمك في وجه اخيك صدقه" فعلا باحس بمعناه فللابتسامه اثر قوي جدا في نفوس الناس وقد قال أبو الدرداء رضي الله عنه عن رسول الله :" ما رأيت أو ما سمعت رسول الله صلى الله عليه و سلم يحدث حديثا الا تبسم " و في حديث آخر عن عبد الله بن الحارث بن جزء قال: " ما رأيت أحدا أكثر تبسما من رسول الله صلى الله عليه و سلم" .
فحري بنا أن نحاول دائما ان نعطي الناس تلك البسمات وان نكون بذلك قوة ايجابيه تدفع الناس الي الحياه لا ان نكون قوه سلييه تضفي علي الناس من الهم ما لا يطيقونه.
وادي بسمه :)

الاثنين، 19 نوفمبر، 2007

عودة



ثلاث أشهر بالضبط مرت منذ أخر بوست كتبته في هذه المدونة

حاولت الكتابه عدة مرات في هذه الفتره لكن كانت تمنعني أشياء كثيرة

ضغطة شغل مطولة شويتين +حبة مواضيع مضايقة الواحد + شبه اكتئاب وانه مفيش فايدة خلاص

وأمور اخري كثيرة الواحد تركها الفترة الماضيه

كنت باقول لواحد صاحبي : انا جبت آخرى من الحياة فقالي ان الامام أحمد بن حنبل عند وفاته قال: "لقد أعطيتُ المجهود من نفسي"

طبعا انا لا جبت المجهود من نفسي ولا حاجه خالص

فكلمة الامام احمد دي اللي قالها لي صاحبي -وان كان قالها لي علي هامش حوار عادي ماعتقدش انه لسه فاكر الحوار ده- خلت الواحد يتكسف من نفسه شويه وانه لسه بدري علي انه يجيب آخره من الحياة

فاللهم ارزقنا علو الهمة

والله المستعان