كشكولي الخاص ستجد فيه آرائي وكتاباتي و خواطري وربما يومياتي .. أتمني أن تستمع بوقتك هنا ومرحبا بك في أي وقت :)

الثلاثاء، 10 يوليو، 2007

شركة سعودية تمنح موظفيها 5.5 ملايين دولار.. خطأً




عنوان البوست هو نفسه عنوان خبر في السي ان ان قصته أن شركة سيارات في المنطقة الشرقية بالسعودية بالخطأ أضافت صفرين إلي أرقام رواتب جميع الموظفين فيها وتم تحويل الرواتب إلي حسابات الموظفين في البنوك بالفعل :)

ولم تكتشف الشركة الخطأ إلا بعد مرور فترة من وقوعه وساعتها حذرت الشركة الموظفين من سحب قيمة أكثر من قيمة رواتبهم لحين تدارك الخطأ.

طبعا موقف كهذا لا يمكن أن يفوت من لا أمانة عنده فعلي الأقل هناك اثنين من الموظفين سحبوا مبالغ ضخمة من حسابهم أحدهم سحب 350 ألف ريال وبعدها اختفي وأغلق هاتفه المحمول عشان محدش يوجع له دماغه.

خبر حلو وغريب :) الواحد قعد يفكر هو ايه اللي سبب الغلطة دي هل مثلا محاسب نيمان (نايم يعني) ولا هاكر دخل علي البرامج (اظن دي بعيده شويه) ولا برنامج الرواتب عندهم فيه خطأ (خطأ يودي في داهية طبعا) .. بس اللي لفت نظري أكتر هو موضوع الأمانة عند الموظفين يعني ايه اللي يخلي واحد عنده الاف وربما بعضهم عنده ملايين جاءت له فجأة تحت تصرفه ولا رقيب عليه إلا الله انه ميستغلش موقف زي ده وياخد أكثر من حقه غير أنه يكون عنده ((أمانه)) وخوف من الله وأنه عارف أن الحقوق والمظالم عمرها ما بتروح عند ربنا !!


أنت لو اتحطيت في نفس الموقف أو موقف شبيه هيكون تصرفك ايه ؟ بلاش دي في حاجات كتير في حياتنا بتتطلب اننا ناخد بالنا كويس أوي من الأمانه.

لو أنت موظف في شركة هل فعلا بتدي الشركه شغل علي أد الوقت اللي مطلوب منك ولا لأ؟

هل بتأدي عملك باتقان كما ينبغي أن يكون ؟

مش هاتكلم طبعا عن موظف الحكومه اللي فاتح درجه ع البحري لكل واحد بيتعامل معاه!!

طب مثلا لو رحت سوبر ماركت أو محطة بنزين وأخذت باقي أكثر من حقك-حتي لو كان زهيد جدا بتطنش وخلاص ولا بتقول للبائع وهو يا أما يكون مسامح أو تديله حقه ؟

طيب لو كان خطأ كبير بتفرح وتقول رزق وجالي ولا بتراجع صاحب الحق ؟

بلاش عندك كام حاجه في مكتبك أو بيتك مهيش بتاعتك؟ عندك كام كتاب أو شريط استلفته من واحد صاحبك ولا هما كتروا واتنسوا مين اصحابهم أصلا؟

موضوع الأمانه موضوع كبير وله معاني كتير أوي غير نطاق الماديات المباشرة المفروض كل مسلم ياخد باله منها كويس جدا لأن والله من أكثر الحاجات اللي مضيعانا دلوقت هي موضوع الأمانة.

هناك 12 تعليقًا:

عصفور المدينة يقول...

جزاك الله خيرا
المشكلة هي تحول الإنسان البسيط العادي المؤدب في لحظة إلى لص لمجرد أن أتيحت له الفرصة وهذه أصبحت تحدث كثيرا وهذا راجع أساسا لعدم تجذر الأمانة في القلوب
الله المستعان

ftataljanna يقول...

السلام عليكم

فى المبانى يعني لما حد بيبني وكده عارف بيكتب كل المصاريف بتاعت المبانى بيقيدها يعني

الحديث بيقول لعن الله الراشي والمرتشي

بس بيقولوا ان فى فتوى لو الحاجة دى بتاعتك من حقك يعني مش هاتاخدها فضل ولا اكرامية نتيجة ان الموظف مرتشي فبتكون مضطر علشان تاخد حقك يقال انه فى الحالة دى مش حرام

واحد مارضيش يدي لنا ورق بتاعنا المفروض ناخده من غير ولا مليم ووقف لنا المبانى

عارف الفلوس اللى اخدها اتكتب تحت اى بند

بند مجدى الجرامى :)

وجيراننا اللى كانوا بيبنوا معانا كاتبينها

مجدى الجرامى المرتشي:)

الامانة

ضاعت

يقال ان فى حديث انا مش عارف نصه
فيما معناه انه اذا ضاعت الامانة و واعطى الامر لغير اهله يعني تقريبا الناس اللى بياخدوا وظايف مش بتاعتهم فانتظر القيامة

أحمد الدرعه يقول...

طب كا كده ممكن نقترح تقنين الموضوع ويكون دفاتر رسميه للرشاوي
مثلا اذن توريد رشوه
===========================
اسم المرتشي:..........
اسم الضحية : ........
المبلغ المطلوب سرقته:......
===========================

مفيش أحلي من النظام ولا ايه برضه :)

Ahmed AL-Hussany يقول...

الامانه ... كلمة كبيرة ياريت نعرف معناها وكفاية نعرف اننا شلناها بعد ما رفضت الجبال انها تشيلها
لكن في الموقف ده انا بصراحة محتار
طبعا اخلاقي وديني هيخلوني ارجع الفلوس
لكن في شق تاني للموضوع
انا بشتغل في الخليج
وشايف تدني المرتبات الجامد لغير الخليجي
وبالذات المصريين
تفتكر الواحد لما يكون مديون لشوشته وعايز يبعت فلوس لاهله ومش لاقي ومكسور عليه الايجار وكتير بيطالبوه بالفلوس السلف ويلاقي المبلغ ده في حسابه هيعمل ايه .....!!
تحياتي

BinO يقول...

الموضوع ده كان بيحصل عندنا عادي يعني
طبعاً مش بنفس المبالغ
بس كان مثلاً ينزل المرتب بالدولار بدل الجنيه
أو مرتب حد تاني ينزل لواحد تاني
بس الأمور ديه كانت بتتحل ودي
وتعتمد علي أمانة الشخص المتلقي طبعاً

علاء يقول...

ده موضوع التجمع ياريت أعرف رأيك

المدوّن خانة

أمــانــى يقول...

الســلام عليكم
انا استغربت اووى من الموظفيين ازاى مفيش حد فيهم قال انه فيه زيادة ازاى كلهم كانوا ساكتين دى كارثة والله
الامانة تضيع كده بالساهل
وحضرتك كمان وضحت شئ مهم اوووى اللى هما بيستلفوا حاجة ومش بيرجعوها للاسف
وقال الله عز وجل فى كتابه العزيز
بسم الله الرحمن الرحيم
إنا عرضنا الأمانة على السموات والأرض والجبال فأبين أن يحملنها وأشفقن منها وحملها الإنسان إنه كان ظلوما جهولا
صدق الله العظيم
تحياتى لحضرتك على الموضوع القيم
انا اول مرة ازور مدونة حضرتك
وتقبل حضرتك مرورى دائمآ

ftataljanna يقول...

هانعمل ايه

بجد حاجة تجنن

ومضطرين بس ماما فضلت تدعى عليه لحد ما دعاها جه بفايدة هيا وتنط جارتنا :)

كان هايترفد من الشغل الراجل ده لانه الظاهر كان بيعطل مصالح الناس وماحدش بعرف من رؤساءه علشان كده لما الموضوع اتعرف خلاص كل حاجة بتخلص من غير فلوس

الحمد لله

اهو فى تغيير ولا ايه

ftataljanna يقول...

بس ايه ده

ده حضرتك طلعت بترد عالتعليقات اهو الحمد لله :)

كنت فاكراك من اياهم :)

عصفور المدينة يقول...

أحمد مررت لك تاج
ورد على الأخت فتاة الجنة عشان بتزعل

نفسنا يقول...

ندعوكم لزيارة العدد الثالث من مجلة نفسنا
ولمن لدية هواية الكتابة ويريد المشاركة معنا نرجو منه مراسلتنا
nafsena@gmail.com

صاحب البوابــة يقول...

وتظل الامانة كنز لا يفنى

تحياتي