كشكولي الخاص ستجد فيه آرائي وكتاباتي و خواطري وربما يومياتي .. أتمني أن تستمع بوقتك هنا ومرحبا بك في أي وقت :)

الثلاثاء، 20 مارس 2007

استيكر لكل شقة

عائدا من عملي وانا افتح باب العمارة التي أسكن بها لفت نظري عدة ملصقات -استيكرز- جديدة علي البوابة "شركة البشاير للاستثمار العقاري" "شركة البشاير للاستثمار العقاري" "شركة البشاير للاستثمار العقاري" "شركة البشاير للاستثمار العقاري" حوالي سبع ملصقات رصت بجانب بعضها لتلحق بعدة ملصقات اخري قديمة تسجل تاريخ الشركات و محلات السوبر ماركت وحتي النجارين و السباكين الذين يقدمون خدماتهم في المنطقة والمناطق المجاورة كذلك.
من عادتي ألا أدع مثل تلك الأمور "تعكنن" علي وأحاول أن أقنع نفسي إن الموضوع عادي جدا إيه يعني شويه ملصقات علي البوابة من بره!! فدخلت للعمارة فإذ بسيراميك المدخل كذلك مزين كله ب"شركة البشاير للاستثمار العقاري" "شركة البشاير للاستثمار العقاري" "شركة البشاير للاستثمار العقاري".. علي طول الممشي للسلم و كذلك شبابيك السلم والحائط ولم يكتف بذلك فوضع علي علبة عداد الكهرباء بجانب كل باب شقة أربع أو خمس ملصقات لكي يتأكد تماما من وصول دمك إلي درجة الغليان.
طبعا لما وصلت لباب شقتي في الدور الثاني كنت قد حفظت رقم موبايل مدير الشركة فأخذت نفس عميق وكلمته:
أيوه حضرتك أستاذ فلان ؟
نعم أي خدمات؟
(قلت في نفسي: طبعا لا حضرتك قدمت الواجب وزيادة) أنا مهندس أحمد أحد سكان عمارة رقم كذا.
يا أهلا وسهلا..
يا أهلا.. حضرتك مليت العمارة بملصقات الشركة و شوهت منظر المدخل تماما و...
طب معلش أنا هاكلم حضرتك كمان ربع ساعة عشان معايا ناس بس.
طب اتفضل. تك.
بعد ساعة إلا ربع يرن تليفون البيت:
ألو..السلام عليكم مع حضرتك مهندس (يعني راجل متعلم كويس) فلان مدير شركة البشاير.
يا أهلا وسهلا..
أنا رحت للعمارة اللي حضرتك بتشتكي لي منها وفعلا الموضوع كان أوفر -over يعني- أوي, أنا كنت قلت للولد اللي كان مسئول أنه يلزق استيكر واحد بس علي كل باب شقة (!!!) و يظهر أنه حب يتخلص من الكمية اللي معاه بسرعه وأنا اسف.
حتي لواستيكر واحد بس مين قال ان ده من حقك ؟!!
أصلا علبة العداد شكلها مش جميل أوي عشان حضرتك تزعل كده وأظن ان الاستيكر شكله مش وحش.
طب حضرتك معروف انه من أفسد شيئا فعليه اصلاحه فياريت تبعت الولد يشيل الاستيكرز (الزيادة).
متعجبا: حضرتك أنا المفروض اني اعتذرت لك.
طب ياسيدي متشكر جدا بس برضه لسه الاستيكرز مشوهه العمارة.
مع اني اعتذرت برضه!! (يعني كفاية عليك كده بأه) لكن ماشي.. ربنا يسهل..
السلام عليكم.
وعليكم السلام. تك.
طبعا لم ولن يأت أحد حتي الان وانا الان وجدت ما يسليني أثناء صعدوي ونزولي علي السلم نزع الاستيكرز!!
وأظن كفاية كده حرقت دمكم أنا كمان :)

هناك 7 تعليقات:

عصفور المدينة يقول...

المفروض يشكروك لأنك عملت لهم دعاية الآن في المدونة
ينقص فقط أن تضع رقم الهاتف

أحمد الدرعه يقول...

نورت المدونة يا عصفور :)
أنا ممكن أحط رقم الهاتف لو حتتصلوا بيه و تعملوا ضده رأي عام :)

abdo يقول...

السلام عليكم
بلاش تحط رقم الهاتف علشان متبقاش دعاية , وبعدين انت زعلان ليه الراجل عامل معاك أحلى واجب واتصل بيك وإعتذر , وكمان حطلك حاجة تتسلى بيها وانت نازل وانت طالع

mora يقول...

و الله الراجل دة المفروض تعرفوا طريق بيتة بأي شكل و تروحوا و طبعا معاكوا أستيكارات مكتوب عيها (شركة تنظيف الإستيكارات الدولية و نمرت موبايلة) و أ÷ي دعاية برضة

Mohamed A. Ghaffar يقول...

شركة البشاير لأستثمار العقارى

شــــمـس الديـن يقول...

يا ربي

الراجل كفايا انه عبرك و كلمك و اعتذر لك !!!

انت هنتهب
لأ بجد الاحساس نعمة اقول ايه

أعمار البشاير يقول...

متهيألي يااستاذ احمد انت مكبلا الموضوع شوية انا الراجل الي كلمك و فعلا انا اعتذرتلك و رحت بنفسي مع الولد وشلنا كل استيكرات المدخل و تركنا استيكر و احد فوق كل علبه عداد الي هيا يجماعه لو شفتوها منظرها قذر جدا على عكس الاستيكر له خلفيه سكيب لاند مع اسم الشركه فقط على علبه العداد فقط بس دلوقتي ان اسف اني شلت بقيه الاستيكارات يمكن كنت اتسليت اكتر و شكرا الدعايه على فكره الحي الي انت فيه في اكتر من 2000 شقه الوحيد الي اشتكى انت و رغم كده انا اهتميت بشكوتك مع انه مش خطأي بس يظهر اني مكنتش مفروض اعمل كده و مره اخرى شكرا