بقيت جافا certified اخيرا

الأول قبل ما تقرأ البوست خدلك كوباية عصير ساقع وحته من التورته حلاوة النجاح :)
الحمد لله بعد مذاكرة أكثر من شهر وقراءة كتابين كاملين وحل 550 سؤال اختياري دخلت النهارده امتحان شهادة 5.0 SCJP أو Sun Certified Java Programmer 5.0 والحمد لله نجحت بنتيجة ممتازة 97% وكده بأه معايا شهادة من شركة Sun -اللي عاملة لغة الجافا- اني بافهم في البرمجة :)
بس برضه الواحد لسه مش عارف يتخلص من الأعراض المصاحبة لإمتحانات الكلية والثانوية العامة -الغريب ان امتحاني جاء متزامن معاها- من كركبة البطن والسهر للفجر والقلق والحلم بأنك في الامتحان ومش عارف تحل حاجه ومأمأة العين في الورق والحته دي مش فاكرها والحته دي مش متأكد منها الخ.. يووه صداع طويل والحمد لله جه بنتيجة والواحد خلص.

أي حد ناوي يدخل الامتحان ده لازم يعمل الاتي :

اختار كتاب كويس يكون اللي كاتبه بيعرف يشرح وفي نفس الوقت يكون مخصوص للاستعداد للامتحان مش كتاب عام في الجافا وانصح بكتاب اسمه McGraw-Hill - SCJP Sun Certified Programmer for Java 5 6 Study Guide (Exam 310-055) - 2006 مؤلفته اسمها Kathy SierraandBert Bates اسلوبها في الشرح جميل جدا ومش ممل زي مؤلفين كتير تنام وانت بتقرأ لهم وفي نفس الوقت عامله في الكتاب تركيز علي التركات والأخطاء الشائعه اللي الناس بتقع فيها وفي نهايه كل فصل في الكتاب في تلخيص له علي شكل نقاط سريعة تفيدك جدا لو أنت طبعتها وذاكرتها قبل الامتحان بالضبط .

اختيار الكتاب مهم جدا لأني معملتش كده في الأول وللأسف بعد ما قريت كتاب من 500 صفحة اسمه Complete Java® 2 Certification: Study Guide, Fifth Edition بتاع اتنين اسمهم Philip Heller , Simon Roberts ندمت جدا لأنه أولا أسلوبه في الشرح يتوه ويقول ويعيد أكثر من مره بدون داعي ثانيا اكتشفت لما بدأت أحل في الأسئلة انه مش جايب سيرة لحاجات كتيرة موجودة في الامتحانات وساعتها بأه دورت علي الكتاب الأولاني وقرأته.

ونصيحة مهمة لازم تكتب برامج كتير بايدك وحاول ما تستخدمش ال auto completion بتاع ال IDEs لأنه بينسيك حاجات كتير.

بعد ما تخلص مذاكرة الكتاب يبقي انت كده قطعت نص الطريق دلوقت ابدأ بحل نماذج الوزارة قصدي نماذج الامتحان :) عشان تتعود علي الأسئلة الشيطانية والحركات والفوازير بتاعت الامتحانات أنا ذاكرت من واحد اسمه Test Killer فيه 240 سؤال يهدوا الحيل بس ممتاز جدا , اسم الملف بالضبط هو 310_055_QA_Test_Killer وفي نموذج تاني اسمه SCJP Exam - 310-055.Exam.Q.and.A.12.06.05-BBL برضه كويس بس ميغنيش عن الTest Killer.

عشان تدخل الامتحان المفروض تدفع
200$
300$ عدا ونقدا عشان تشتري تذكرة الدخول للامتحان أو الVoucher بتاع الامتحان وده لما بتشتريه بيكون عليه رقم مميز وصلاحية الvoucher ممتدة لمدة سنة من تاريخ اصداره انا اشتريت بتاعي من شركة اسمها Linux Plus في كورنيش المعادي.
بعد ما تكون خلصت مذاكرة وخلاص مظبط أمورك المفروض تحجز ميعاد تمتحن فيه عند أي مركز امتحانات معتمد من Prometric المركزين اللي أنا أعرفهم في مصر هما مركز VirgiTech (ليها فروع في القاهرة والمنصورة) ومعهد ال ITI الموجود في شارع الهرم في الجيزة بالنسبة لمركز VirgiTech لازم تكلمهم قبلها بيوم وليهم مواويل في الحجز انما الITI ممكن في نفس اليوم بس يكون من بدري و بشكل عام مريحين في التعامل عن VirgiTech وأكيد طبعا في مراكز تانية بس أنا ماعرفهمش.
قبل ما تروح تمتحن صلي ركعتين حاجة لله عز وجل وثق في ان الله لن يخذلك بإذن الله ولا تنسي دعاء الانتهاء من المذاكرة "اللهم اني استودعك ما علمت وما حفظت اللهم رده الي عند حاجتي اليه انك علي كل شئ قدير".
قبل الامتحان بتملأ استمارة فيها معلومات شخصية عندك هتطلع في بيانات الشهادة بتاعتك وبعد ما تخلص مرحلة التسجيل المفروض الموظف في المكان اللي هتمتحن فيه يعمل داونلود للامتحان بتاعك من سرفرات Prometric بيقعد حوالي 10 دقايق وبعد كده بتبدأ الامتحان.
الامتحان مكون من 72 سؤال ومدته 3 ساعات وربع فنصيحة قبل ما تبدأ الامتحان تدخل الامتحان وتظبط أمورك وتتوضأ عشان لو جه وقت الصلاة أثناء الامتحان تكون جاهز وبرضه مفيش مانع تشرب علبة عصير و-اذا كنت همتحن في الصيف-تشتريلك أزازة مية تخليها معاك عشان تركز في الامتحان وبس.
الامتحان Closed Book يعني ميكونش معاك حاجه فيها ريحة الجافا وبتقفل موبايلك وبتسلمه للموظف المسئول عنك والمفروض يديك ورقة بلاستيكية وقلم فلوماستر قابل للمسح عشان تفكر فيها لو احتجت انك تكتب حاجه واثناء الحل وطبعا بياخدها منك بعد ما تخلص الامتحان.
ابدأ ببسم الله وقل دعاء الامتحان .. الامتحان عبارة عن برنامج ويندوز وبيشتغل بوضعية full screen ومتقدرش تنزله minimize وتشغل برامج تانية طبعا عشان الناس اللي بتفكر كتير ;)
في البداية يبكون في حوالي 10 اسئلة زي استبيان كده عن الجافا -غير محسوبة في النتيجة طبعا- بعدها تبدأ الاسئلة الفعلية وهناك اكثر من نوعية من الاسئلة الاكثرية هي اسئلة ال MCQ او الاختيار من متعدد وفي السؤال بيحدد لك كم اجابة المفروض تختارها -ودي نقطة كويسة صراحة- وفي نوعيه اخري بيظهر لك كود فيه اجزاء ناقصة وانت بتكملها من جمل موجوده في السؤال بطريقة Drag & Drop.
كل سؤال ممكن تختار انك تعمل عليه علامة أو mark وممكن تكتب ملاحظة علي كل سؤال في خانه جانبية لنفسك عشان لما تراجع تبقي تقراها.
لما تنتهي من حل كل الاسئلة بيظهر لك تقرير بالاسئلة والاجابات بتاعتك والاسئلة اللي انت عملت عليها علامة بيكون قصداها لون أحمر بحيث تراجعها بسهولة وعموما اي سؤال ممكن تختاره وتفتحه من تاني للمراجعه بس هنا في مشكلة صغيرة ان الاسئلة اللي من نوع Drag&Drop لما تيجي تفتحها مره تانية بيمسح الاجابه بتاعتك فكده هتفكر فيها من تاني فالافضل لو كنت ناوي تراجع سؤال من دول وانت بتحل انك تكتب الحل في خانة الملاحظات او في الورقه البلاستيك اللي معاك عشان تكون اعادة كتابة الاجابه مفيهاش تفكير منك مرة اخري.
بعد ما تراجع الاسئلة بتضغط علي زر End عشان ينتهي برنامج الامتحان وبعدها بخمس ثواني - كانوا أطول خمس ثواني في حياتي مممممم مش في حياتي كلها علي الاقل في السنتين اللي فاتوا من بعد يوم كشف التجنيد- بيطبع لك تقرير علي الطابعه فيه النتيجه بتاعك اما ناجح Pass او راسب Fail ناجح بتكون من 59% وبيطبع معها تقرير عن أدائك في كل نوعية من الاسئلة مثلا أسئلة الThreads كانت 100% واسئلة الObject Oriented كانت 70% وهكذا عشان لو احتجت تقوي نفسك في جزء معين.
وبالتوفيق للجميع.
ملحوظه اخيرة : لو حد عايز الكتب اللي انا قلت عليها هنا يبقي يقولي وانا ابعتها له بإذن الله.

تحديث: قمت برفع الامتحانات والكتاب لمن يريد أن يحملها مباشرة:
امتحان 1
امتحان 2
امتحان 3
Exam Simulator
الكتاب JAVA5
الكتاب JAVA6